O Concello pedirá dous novos obradoiros de emprego, formando a 36 veciños e veciñas na posta en valor do patrimonio, a través da dixitalización

Trátase dos proxectos Lethes.TIC e Atrium.TIC, cun importe conxunto duns 498.000 euros

Xoves, 06 de xuño de 2019
Fonte: 
Gabinete de Prensa

O Concello de Lugo solicitaralle á Consellería de Economía, Emprego e Industria dous novos obradoiros de emprego por un importe conxunto duns 498.000 euros para mellorar a inserción laboral de 36 veciñas e veciños desempregados, ofrecéndolles formación no eido das novas tecnoloxías relacionadas coa posta en valor do patrimonio cultural de Lugo. Trátase dos proxectos Lethes.TIC e Atrium.TIC.

A Concelleira de Economía, Emprego e Desenvolvemento Económico en funcións,  Ana Prieto, enmarcou estas novas actuacións na responsabilidade do Concello e na súa obriga de facer todo o posible, con recursos propios ou, como neste caso, tratando de captar investimento doutras entidades, para paliar o desemprego no municipio.

Obradoiro de emprego LETHES.TIC

Cun orzamento de 324.896 euros,e dirixido a 20 persoas, contará cun dúas especialidades formativas: Dinamización, programación e desenvolvemento de accións culturais e Produción fotográfica. Cada unha destas especialidades contará con  10 alumnos/as traballadores/as, que ao finalizar terán acceso a un certificado de profesionalidade de nivel tres.

Cunha duración de 9 meses, incidirá na implementación das TIC na difusión e promoción da rede museística do Concello de Lugo coa finalidade de dinamizar o patrimonio histórico da cidade de Lugo; fomentando a súa xestión mediante a aplicación das novas tecnoloxías, cun  tratamento específico para favorecer a súa preservación de cara ao futuro e a mellorar a súa difusión e acceso por parte do conxunto da cidadanía.

Entre as súas actividades principais figura o desenvolvemento de visitas virtuais e percorridos 360 aos espazos museísticos e expositivos do Concello, o deseño e desenvolvemento do programa cultural “Lugo na memoria. Un percorrido pola historia da cidade” que permita poñer en valor o importante pasado da cidade máis aló da súa significativa relevancia en época romana e o desenvolvemento dunha campaña de difusión e valorización do comercio histórico da cidade coa creación do selo “Establecemento singular de Lugo” para recoñecer a aqueles establecementos que pola súa historia e vencello coa cidade forman parte da súa memoria colectiva.

Obradoiro de emprego ATRIUM.TIC

Vai dirixido a rapaces e rapazas menores de 30 anos e conta cun presuposto total de 173.553 euros.  O obradoiro estará integrado por: 1 Director/a, 2 monitores/as e 16 alumnos/as, repartidos nas seguintes especialidades formativas: xestión documental e dixitalización de documentos. O proxecto executarase durante 6 meses, dende setembro de 2019 a marzo de 2020.

Este obradoiro inclúe a organización e  informatización dos arquivos de oficina de distintos servizos municipais, así como dixitalizaación de expendientes ou actas.

Noticias relacionadas