Cinco meses con 17 propostas de artes escénicas no Auditorio Municipal Gustavo Freire

O Goberno de Lugo programa para estas instalacións municipais espetáculos para adultos e para familias, así como teatro clásico, danza e música ata o mes de xuño

Carmen Basadre presentou a programación cultural, coa que se busca ofrecer a todos os públicos diversas propostas  relevantes de arte na cidade

A axenda contempla o inicio o 2 de febreiro, coa obra Eroski Paraíso, a primeira produción de Chévere despois de recibir o Premio Nacional de Teatro

O horario para os espectáculos familiares é ás 18:30 horas, e para adultos, ás 20:30 horas. Estas actividades están organizadas polo Concello en convenio coa AGADIC. Teatro clásico, danza e música tamén serán ás 20:30 horas

O importe das entradas para obras e concertos para público adulto é de 10 euros en zona A e 8 euros en zona B. Para espectáculos para público familiar a entrada é de 4 euros para os adultos e nenas e nenos, dous. Existen bonos e descontos

Venres, 25 de xaneiro de 2019
Fonte: 
Gabinete de Prensa
Cinco meses con 17 propostas de artes escénicas no Auditorio Municipal Gustavo Freire

O Goberno de Lugo programa para o Auditorio Municipal Gustavo Freire espetáculos para adultos e para familias, así como teatro clásico, danza e música ata o mes de xuño. A Concelleira de Cultura, Turismo, Xuventude e Promoción da Lingua, Carmen Basadre, presentou este venres, na Sala de Usos Múltiples do Edificio de Novas Tecnoloxías, a programación cultural, coa que se busca ofrecer a todos os públicos diversas propostas  relevantes de arte na cidade.

A axenda contempla o inicio o 2 de febreiro, coa obra Eroski Paraíso, a primeira produción de Chévere despois de recibir o Premio Nacional de Teatro. Trátase dun proxecto escénico construído sobre a promesa dun paraíso social feita por un Estado de Benestar que agora se desmorona. O paraíso prometido era en realidade un gran hipermercado. Este é o retrato dunha xeración que tivo todo ao alcance da man e andou pola vida como se andase polo corredor dun supermercado, sometida ás mesmas técnicas de márketing que se usan para influír nas decisións de compra das persoas consumidoras.

A programación é a seguinte:

  • 9 de febreiro - Pentación - Fedra. Fedra, a raíña da Illa do Volcán, está enferma. Os médicos son incapaces de averiguar a orixe do seu padecemento e o país enteiro anda preocupado polo seu estado de saúde. Algúns din que se volveu tola. Outros, que as longas ausencias do seu home, o rei da illa, remataron por devastar e asolar o seu corazón. Pero ninguén coñece a verdade e todos se equivocan. E é que a gran responsable da doenza de Fedra non é outra ca unha paixón que a atormenta desde hai tempo e que xan non pode reprimir máis: un erotismo inmoral e impúdico, un desexo violento e indómito, un amor prisioneiro e indecente. O que se quixo con esta Fedra é sacar á personaxe dese letargo no que sempre se encontrou para crear unha muller máis combativa e con menos medo; unha persoa que, fuxindo da traxedia, se mergulle de cheo nela e pelexe fronte a fronte; unha muller exenta de culpa, capaz de loitar polo que quere e que, ante todo, se atreva a amar.
  • 10 de febreiro - Larraitz Urruzola - A viaxe de Rosalía. A protagonista desta viaxe é Rosalía de Castro, que vén coa súa madriña Francisca. Xuntas contarán pasaxes da vida da artista e algúns dos seus poemas, da man da actriz e titiriteira Larraitz Urruzola. Utilízanse títeres de mesa, onde o traballo de manipulación se fai á vista, creando diálogo entre actriz-títere-público-actriz.
  • 9 de marzo - Markeliñe - Euria. Premio FETÉN 2017 ao mellor espectáculo, Euria (chovia) fala do que pasa cando algo ou alguén a quen queremos xa non está. E de todo ese fastidioso tempo que necesitamos para entender e aceptar que algo cambiou. O espectáculo está feito con: gotas de auga, un paraguas colorado, unha caixa de ferramentas, bágoas gardadas nos caixóns,  4 acrobacias,  outro paraugas abandonado e roto, acenos fermosos nunha canción triste, un ferro de pasar louco, un espertador de moitos recordos, unha ventá ao exterior e un sol debuxado. E, mesturándoo todo de maneira máxica, parece que falamos, á fin, da nosa capacidade de superación.
  • 10 de marzo - Ítaca teatro - Cinco minutos sen respirar. Retrata os anhelos, o medo e a escuridade que pode albergar unha persoa a través de dous personaxes: Margarita, unha (ex)empregada de banca, e Víctor, supervisor nun supermercado. A montaxe é unha proposta baseada no traballo de interpretación e cunha dirección escénica que incide nos delirios e nas dualidades propias do mundo de hoxe. Cinco minutos sen respirar fala da vida, dos abusos bancarios, do amor, da explotación laboral, do suicidio, da familia, da violencia... e de tantas outras cousas que non dá tempo a resumilas en cinco minutos.
  • 16 de marzo - Gustavo Almeida - Presentación cuarto disco. Concerto en formato banda, onde Gustavo, ademais de pola súa guitarra, estará acompañado por batería, percusión, baixo, teclado, guitarra acústica, guitarra eléctrica, metais e coros. Un formato que permite respectar ao 100% a sonoridade do disco, coa dinámica e a versatilidade moi características de Gustavo Almeida.
  • 22 de marzo - Concerto de Víctor Manuel - Casi nada está en su sitio. Presentación do seu novo traballo.
  • 23 de marzo - Coprodución Centro Dramático Nacional e Octubre Producciones - Si no te hubiese conocido. Eduardo, home de negocios, moi namorado da súa muller Elisa, provoca involuntariamente unha traxedia. Óscar e Clara, os seus mellores amigos, intentan axudarlle infructuosamente. Para superar o seu trauma, Eduardo introdúcese nun labirinto de pensamentos confusos e caóticos e consegue viaxar cara a atrás no tempo. O seu obxectivo é reencontrar a Elisa viva e intentar, por todos os medios, evitar coñecela para, así, borrar a traxedia da súa futura e traumática perda.
  • 7 de abril - Os Monicreques de Kukas - Arlequina. Espectáculo de gran formato que combina o traballo de actor e a pantomima coa animación de marionetas  e a maxia coa música en directo nun espazo escénico polivalente e suxestivo no que todos os elementos forman parte da divertida, misteriosa e trepidante aventura que supón a viaxe dunha peculiar e curiosa marioneta chamada Arlequina na busca da súa identidade contando para iso coa axuda de Marchelino, un vello e estrafalario artista e titiriteiro.
  • 13 de abril - Atalaya teatro - Rey Lear. Baséase nun conto popular que aparece incorporado á historia antiga de Inglaterra desde o século XII. Contan crónicas que o vello Lear quixo coñecer  o grao de afecto das súas tres fillas para designar sucesora a quen máis o quixera. Dúas desfixéronse en gabanzas e a menor contestoulle que o quería como pai e nada máis. Pareceulle pouco ao rei, que a castigou. O tempo e as peripecias virían demostrar máis tarde que era a única digna do trono que, por fin, tras unha guerra coas irmás, conseguiu. Shakespeare amplía e transforma a trama, infundíndolle unha visión persoal. Paralelamente á propia historia de Lear, plasma a de Gloucester e os seus fillos. O resultado supón unha experiencia extrema de dor, loucura e destrución expresada cruamente e sen reservas.
  • 27 de abril - Fran Sieira- EntreSoños. É unha obra de baile e música tradicional galega de 70 minutos de duración. Nela poderase ver en escena a figura dunha persoa deitada, inmersa nun profundo soño, pero lonxe de conseguilo é invadida por milleiros de pensamentos e inquedanzas. Dentro dos seus soños cobra vida esa valentía por conseguir todo o que se propoña, pero tamén o fan as súas debilidades, medos e frustraccións. Unha loita por alcanzar ou dar vida a eses soños que nunca puido ou se atreveu a levar a cabo, á vez que os medos e inseguridades o invaden dicíndolle que non son máis que soños  que desaparecerán cando esperte… escenificando deste xeito encrucilladas nas que cada un de nós nos vimos envoltos nalgún momento das nosas vidas. Esas ganas de perseguir os nosos soños e inquedanzas e eses medos que nos paralizan e non nos deixan avanzar…
  • 2 de maio - Contra Producións - Commedia. Humor, acrobacias, música en directo, diálogos mordaces, teatro físico, canto e baile sucederanse entre divertidos equívocos e enxeñosos enredos arredor do amor romántico e dos riscos da sinceridade, coa participación das principais figuras da “commedia dell´arte”: o cutre taberneiro, o pedante Dottore, o avaro Pantalone, o fanfarrón Capitano, a encantadora Arxentina…
  • 18 de maio - Concerto de Leilía - Cantar-Elas. Ás portas de facer 30 anos xuntas, Leilía afronta este aniversario coa presentación dun novo espectáculo que revise a súa discografía, a súa traxectoria musical fiando as súas orixes coas aprendizaxes adquiridas ao longo destes anos.
  • 19 de maio - 17.30 e 18.30 horas.- Babaluva - A Alfombra Máxica. A alfombra máxica é un lugar de libre experimentación, unha alfombra táctil, sonora e olfativa onde a artista plástica convida aos máis pequenos a mergullarse nunha viaxe sensorial. Xuntos descobren o pracer de apalpar, manipular, escoitar, ver, saborear...Unha invitación a xogar e experimentar con todo o corpo. Monicreques, música e outras sorpresas viaxarán cos máis pequenos e  cos seus acompañantes adultos por un mundo de emocións e sensacións.
  • 25 de maio - Rafael Amargo - Dionisio. Conta a historia de Dionisio, o deus grego do teatro, o viño, a éxtase e a fertilidade. Chorrea sobre a terra viño e ábrelles aos humanos o seu paraíso salvaxe, a alteridade, o que está prohibido. Dáselles a todos (homes e mulleres); é o deus á vez transgresor, pero tamén a chama viva que busca a paz. É un deus errante que navega sen rumbo, xerador de danzas frenéticas, pero tamén é o perseguido, o doente ou o moribundo. Celebrou o seu último nacemento, xerando utopías que oscilan entre a sabedoría tráxica e o nihilismo narcótico, pero sempre renace con Eros en forma de luz.
  • 30 de maio - Pentación - Cinco horas con Mario, de Miguel Delibes. Fala dos asuntos eternos do ser humano: da culpa, da soidade, da incomunicación, do sentido da vida. Como sempre en Delibes partindo dun localismo concreto encarna nas súas personaxes e nos seus conflitos as realidades más profundas e complexas que condicionan a vida.
  • 9 de xuño - A Trastenda dos Contos (Caxoto) - Unhas gafas coma as do avó. É un espectáculo inclusivo, en lingua oral e lingua de signos. Nel as dúas linguas mestúranse creando un espazo inclusivo para persoas xordas e oíntes; a palabra falada e a palabra signada míranse de igual a igual. Trátase dunha oportunidade que terán as persoas oíntes para coñecer a "cultura xorda" e así mesmo unha oportunidade para as persoas xordas de participar dun espectáculo feito á súa medida. Neste espectáculo, Laura é unha nena moi bulideira que todo o tempo anda á procura de aventuras que vivir. Un día sente curiosidade polas gafas do seu avó; cómo se verá a través delas? O que comeza sendo unha pequena trasnada acaba por converterse na maior de todas as aventuras.

Horarios e prezos

O horario para os espectáculos familiares é ás 18:30 horas, e para adultos, ás 20:30 horas. Estas actividades están organizadas polo Concello en convenio coa AGADIC. Teatro, danza e música tamén serán ás 20:30 horas, salvo o de Gustavo Almeida, que será ás 20:00 horas. O importe das entradas, para obras e concertos para público adulto é de 10 euros en zona A e 8 euros en zona B. Existe desconto do 20% para persoas en paro, menores de 30 anos, pensionistas e actores e actrices asociados á Asociación de Actores e Actrices de Galicia (AAAG). O bono para catro funcións do Teatro Clásico é de 25 euros. As entradas para o concerto de Víctor Manuel é de 20 euros, con desconto do 10% para persoas desempregadas, menores de 30 anos, pensionistas e actores e actrices asociados á AAG. Para espectáculos para público familiar a entrada é de 4 euros para os adultos e nenas e nenos, dous euros.

As entradas poderán mercarse a través do portal web entradaslugo.es e na  Oficina Municipal de Turismo, na Praza do Campo, ata 3 horas antes do comezo de cada función; e no auditorio, o día da función, desde unha hora e media antes do comezo do espectáculo. As persoas que adquiran entrada con desconto deberán acreditarse na porta de acceso.

Os bonos poderán adquirirse na Oficina de Turismo no seu horario de apertura habitual ou a través do portal web entradaslugo.es ata o 8 de febreiro.

Audios

Noticias relacionadas